投資做少好過做多

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲 click 下面個制 subscribe 喇 👇

想睇我之前寫過咩？快啲 click入黎啦！

最近睇《信報》見到有個專欄叫人退休之後唔好躺平唔管理財富、要考慮埋其他風險（例如通脹、醫療），去到呢度我都非常認同，但睇落去，作者叫大家「把資金繼續停泊在強積金賬戶，由專業人士管理投資」，再碌過去睇作者邊位，原來係「富達香港退休金及個人投資業務銷售總監」，所有謎團解開了。

嗱，戴定無限個頭盔先，我嘅觀念同做法未必人人認同加啱使，但係我攞得強積金出嚟一定會自己管理，慳翻啲管理費，前提係你夠自律、有計劃，如果有幾十萬落翻戶口就 high 咗，咁我建議都係繼續放係到滾下先。但相信睇開 me want faat daat 嘅大家都唔係呢種人，尤其我成日都話專業人士、芬佬無大家想像咁巴閉，大把人都輸比個市，佢地就算輸錢望落去都咁光鮮係因為有得賺客仔嘅管理費同佣金 ma。

自己理財首先要有合理期望

做少好過做多咗唔代表完全唔 do，好似我話揸住層樓收租都要維修同揾租客，被動收入係虛構的，主動理財先係真理。唔係叫大家當正股神咁奮身（睇過連登財經台就會觀察早兩年個個都話自己入咗邊隻 meme stock / TQQQ 賺到上太空，今年就最多人開 post 話自己輸幾多，無論真假都要提大家：照下鏡啦！你唔係巴菲特！），亦唔係叫大家一世做定期，而係對財富有合理增長預測同克服到股市上上落落，理解有風險就有回報。

標普年初至今跌咗兩成，無人估到幾時見底又或者呢兩個禮拜升勢會唔會持續，而過去 12 次熊市由底部去翻收支平衡（而家水平升三成）平均需要 21 個月。如果真係用兩年就收復失地，即係之後每年回報有 14%，如果三年做到就係每年 9% 回報率，所以跌嘅時候分批繼續入，將來回報唔會虧待你！

最後引用 Jack Bogle 嘅說話，個人投資者致富之道就係要避開高收費、唔好投機同成日轉嚟轉去，時間同複利先係財富嘅好友。Be patient and get rich！

祝大家荷包早日fat fat 🤑

- me want faat daat