小賭怡情 大賭變李嘉誠

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲 click 下面個制 subscribe 喇 👇

想睇我之前寫過咩？快啲 click入黎啦！

第一次交學費嘅故事

話說21年頭大宗商品股升到wawa聲，好似木材、金價不斷創幾年高位。嗰陣唔少新聞都係到吹捧呢啲商品股，天真嘅我以為跟呢個勢實無死喇掛，買！結果大家都估到，我就係咁第一次交學費。幸運嘅係，我一早有曬心理準備點都會輸啲錢，所以時時刻刻提醒自己：淨係買輸得起嘅錢！  

呢一次教訓就係：到你想追買各類新聞或者媒體吹緊嘅股，你已經太遲了。要有媒體廣泛報導，個勢肯定唔知升咗幾多日、有唔少芬佬[1]賺咗錢先會有外行人察覺到，即係呢單所謂「新聞」唔知隔咗幾多層先到你。如果做第二個誠哥有咁易，呢個世界一早無窮人啦。

輸咗啲咩？

啱啱開始買股票嘅後生仔，又或者親身經歷2020年疫情爆發之後科技股係咁升而投身股市嘅人，唔少人真係求其買都買中，但21年至今好多靠疫情發達嘅股票係高位回落唔知幾多成（例如連登契媽Cathie Wood嘅ARKK跌一半有多）。

普通散戶難發達不外乎都係幾個原因：

1. 股票唔係我地專業：有幾多人識得睇嗰份成百幾頁嘅公司週年報告？ 

2. 普通打工仔根本無時間了解股市：有幾多人有時間睇曬嗰份成百幾頁嘅公司週年報告？ 

3. 贏錢好講運氣：你實力好得過巴菲特？

等等先，運氣 > 實力？唔信可以睇下面兩個例子先：

例子1：華爾街輸大市

試問有邊個唔想大賭變李嘉誠？但現實就係，連24小時睇住個mon嘅芬佬都贏唔到大市。

2021年標普500回報有27%，但係上面呢堆大間基金得三間跑贏大市，仲有八間係輸錢。

例子2：猩猩贏華爾街

1999年有一隻六歲猩猩成為華爾街第二十二名最賺錢經紀（健力士世界紀錄都有記載）：呢隻猩猩用抌飛鏢嘅方法揀股，最後佢個基金升超過200%，贏超過六千位經紀。

你嘅投資心態如何，你嘅成績也必如何

想賺快錢同賺大錢嘅心態同買六合彩無分別，參考Vanguard（全球最大基金管理公司之一，管理資產超過七兆美金）創辦人John Bogle嘅《The Little Book of Common Sense Investing》，越簡單嘅投資理念越幫到你賺：買指數型基金 (Index ETF)，唔好諗住靠揀股贏。原因係指數基金係最分散投資、最慳成本同最簡單嘅組合。呢個方法當然幫唔到你發到好似巴菲特，但跟住大市可以幫你慢慢地、靜靜地贏。如果都仲係想挑戰自己買個別股票，就淨係攞輸得起嘅錢（例如資產5%）試下，揀啱股梗係恭喜你，但連續幾年跑贏大市？專業投資者都做唔到嘅話，你覺得呢？

John Bogle計過，十年之間得9%投資基金賺得多過指數型基金，去到五十年更加得翻2%，聰明嘅你應該知道點揀啦。

祝大家荷包早日fat fat（同埋身體健康啊！）

 - me want faat daat

[1] 芬佬 = fund佬、基金經理