增加收入嘅方法

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲  click 下面個制  subscribe 喇 👇

想睇我之前寫過咩？快啲 click入黎啦！

話說我畢業之後都成半年先揾到第一份 full time 正職，但熱愛金錢嘅我點會就咁躺平 😎，嗰陣keep 住翻 part time 賺嘅錢幾乎同我份正職人工差唔多（其實係多得份 FT 人工低 🙃）。而我都無放棄秘撈，趁後生、疫情出唔到去同有精力賺得就賺，生活費就盡量唔掂份正職嘅糧（成日收銀行電話我就知道 AI 發展有排行 🥱，如果唔係點會係咁 sell 我一個唔亂消費又儲得多錢嘅人）。

我最理解不能係廣告成日 sell 「被動收入」，除非係富貴到可以日日攤係張床等人養或者啲錢係天到跌落嚟，就算揸住層慈父慈母嘅樓收租，你都要定期管理層樓或者揾租客。仲有好似上個世紀買匯豐收高息過一世呢類「被動收入」，一你要主動買好多好多股啲息先夠你用，二後生根本唔會有資本買咁多，三匯豐唔知沉咗幾多年。所以我下面只會同大家一齊度下可行嘅主動增加收入方法：

•  賣時間 / 服務：補習、各種炒散、freelance

👍pros: 收現金，盡用自己才能

👎cons: 客源唔穩定，本身有份好忙嘅正職會好攰

• 開網店

👍pros: 發達嘅機率同揾嘅錢肯定多過做 part time

👎cons: 投放極多時間同心力，唔係個個有 sell 嘢才能同喜好 

• 買樓放租

👍pros: 相信國家同黨，香港只會變得更好，樓價蒸蒸日上

👎cons: 本金極大，無慈母慈父好難上車，要定期做管理（同租客溝通、揾租客）

• 投資（股/債）

👍pros: 有睇過我之前啲 posts 都唔使多就解釋，避免現金貶值又相對低成本嘅揾錢方法

👎cons: 市場波幅大，唔係個個頂到壓力，好講耐性，要長時間先見到成果好過其他揾錢方法

• 另類投資（crypto、藝術品）

👍pros: 近期熱門，人多夠托就唔怕

👎cons: 市場波幅仲大過股票，無咩歷史參考，太新 / 多呃人產品，市場無咩規管同保障

• 其他投資：黃金、定期、儲蓄保

👍pros: 好過擺床下底

👎cons: 淨係好過擺床下底，無其他優點

• 最老土又最有效嘅投資：投資自己

我地最大嘅資產就係時間：畢業無耐份糧多極有限，但你有時間學習、周圍遊歷同試新嘢，就算撞板都仲可以嚟過，唔似班上咗岸、有家庭或者財政負擔嘅黎生s，大部分人生淨係驚有無得翻工。投資自己唔單止係叫你學技能同提升競爭力，無論係周圍遊歷、發展興趣定支持有理念嘅事都係，只不過回報未必係錢，而係擴闊咗眼界同增加人生經驗。

講咗咁多次要 diversify 投資，你又 rebalance 咗未呢？

祝大家荷包早日fat fat 🤑

- me want faat daat