🤑 靠儲人工是唔夠的（廢話）

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲 click 下面個制 subscribe 喇 👇

想睇我之前寫過咩？快啲 click入黎啦！

先講聲唔好意思，上星期工作忙到 skip 咗一篇（臨轉工先嚟多嘢搞，希望新工繼續比我有時間寫下文啦）。

香港人真係好 L 有錢（可以睇翻之前嘅《2022 全球財富報告出爐了》、《要幾多錢先叫有錢？》）

明明我地成日聽話人工 N 年無加過、中位數 N 年都係差唔多，點解香港人咁有錢？有睇開新聞應該都有印象，香港人每月工資中位數其實唔算高，最新數字係 $18,700，一年就 $224,400。

如果同全世界比：

我當香港人收入中位數除 7.8 = 美金 $28,769/年， 同全球中位數 $7,000 比我地梗係超曬班，三萬美金放係亞洲 = 最 top 九成添 ，同北美、歐洲同澳洲等超發達地方比就差唔多（稅前）。但最 top 25% 同 10%，香港就輸美國、加拿大同歐洲，例如香港最 top 10% 揾差唔多美金 $71,076，而美國就去到十萬一年，計埋稅都應該高過我地。 當然，同最有錢嘅美國比梗係會差啲，同全世界比香港人已經揾多好多，仲要我地稅低，資產增值稅都無，香港相對容易儲錢是真的。

靠政府退休是唔夠的

我都唔想 N 篇係到插強積金，但除咗之前一直講嘅收費高，仲有一樣衰就係供款額低（淨係講強制供款，收費咁高仲自願傻咩），每個月最多得 $3,000，一年 $36,000。

美國 401(k) 退休計劃 2023 年淨僱員供款上限去到 $22,500 美金 = 港幣 $175,500，僱主 + 僱員供款上限就係 $66,000 = 港幣 $514,800，同香港 $36,000 比多成個 digit，仲要人地交齊社會安全稅（僱員多數交 6% 人工），退休後每個月嘅 Social Security 平均有千五美金 = 接近一萬二港紙，同我地啲長者津貼同生果金比🤑，後生唔做好計劃真係等住自生自滅啦。

求人不如求自己

唔知大家有無上過去政府開嘅投資者及理財教育委員會網頁，有堆計數機比人用，內容都易睇，但佢唔做宣傳唔知邊個睇 🤔（我係揾資料先偶爾見到呢個網），而且個 blog 無咩 update。但香港人叻咩？😎 咪就係自己嚟囉，唔通真係等共同富裕咩。

趁後生揾多啲有質素嘅資料嚟睇，唔好怕麻煩或者睇唔明，呢個年代網上咁多資源，你肯花啲時間、用啲腦就唔難學識管理同增值財富，唔好老咗先好似啲阿叔阿嬸靠人地過幾個冧把嚟買股票，大家賺嘅辛苦錢一定要好好投資同滾大佢！

祝大家荷包早日fat fat 🤑

- me want faat daat