新手點開始投資？

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲 click 下面個制 subscribe 喇 👇

想睇我之前寫過咩？快啲 click入黎啦！

*利申：唔好將 me want faat daat 嘅內容直接當投資建議，記得諗清楚自己計劃、目標、可承擔風險同財政狀況，最緊要多做 research，考慮完落手唔會後悔先好去馬啊！

有位朋友睇咗 me want faat daat 咁耐終於開始行動，但唔係開始入市，而係開轉數快同唔同銀行戶口 😐。me want faat daat 嘅目標唔係教大家點開銀行 / 證券戶口呢啲簡單 google 都有嘅方法，而係希望同好似我呢啲無咩財經 / 金融知識嘅朋友交流理財知識，但無論你去到邊個階段，只要願意行動都係好嘅開始！今日就同大家講下新手投資應該考慮嘅事。

新手問題 1：幾時開始投資？

如果你無欠咩債（例如得學債）+ 有一定存款（例如 $5 萬穩定在手），咁就可以開始投資了。曾經我都以為投資要有一定資本先可以開始，但投資正正係幫你已有資本增值嘅方法，根本唔需要等到話有 $5 萬定 $10 萬係手先去馬，更何況而家投資門檻咁低，越早開始越著數！

新手問題 2：投資啲咩？

投資產品有好多種：股票、債券、金銀、土地...... 最簡單嘅組合就係 1）短期投資：現金 / 定期 + 2）長期投資：股票（+ 債券），然後再決定每樣資產嘅比例，例如非常進取嘅可以 5% 現金 + 95% 股票，穩陣嘅可能 10% 現金 + 30% 債券 + 60% 股票，總之按你個人目標、風險承受能力同財政狀況嚟定自己嘅計劃，絕對無必要跟其他人嘅做法，啲錢係賺比自己用，唔係同人比。

啱啱開始唔知點做好，咁咪逐啲逐啲入，比個時間自己（例如呢半年內我要投資 $5 萬），再考慮re-balance（調高 / 調低某個資產嘅比例），最緊要自己 feel comfortable 同晚晚訓得著。

投資組合唔使太複雜，兩、三樣資產對我地啱啱出嚟做嘢嘅人已經足夠，因為 a) 管理方便 b) 慳時間慳精神 c) 資本唔多無咩需要。

新手問題 3：成日講嘅 ETF 咩嚟？

ETF 係跟蹤個別市場指數表現嘅基金，而且好似股票係交易所買賣，同一般共同基金 (mutual fund) 要跟經紀買唔同。ETF 款式好多種，有跟蹤最大 500隻股嘅標普 500 (S&P 500)、科技股為主嘅納斯達克指數 (NASDAQ)、 某個特定行業（例如銀行股、工業股）等等。

買 ETF 嘅好處有：

1. 夠多元化：無人可以預測將來邊嘅行業、個股跑贏，跟住個勢行最簡單就係買追蹤大市嘅 ETF，例如追蹤標普 500 嘅 SPY / VOO，簡單唔使煩，追蹤所有股票嘅 ETF都有（例如 VTI）。

2. 低成本：手續費、管理費、時間、精力、opportunity cost 等等，慳到幾多就自己賺多啲，例如上面提及過嘅 VOO 屬於 Vanguard 嘅產品，而 Vanguard 最出名就係極低費用嘅 ETF，開支唔多過 0.05% 嘅選擇並唔少，大家可以上 Vanguard 睇下佢地嘅 ETF 產品咩嚟同啱唔啱你。

 新手問題 4：點解買 ETF 唔買個股？

1. 估中邊間公司 / 邊個行業賺足 20 年好難

2. 跑贏大市好難

3. 賺快錢極難

總結

理論係一回事，正式擺錢投資係另一回事，所以理財計劃非常重要，就算一時情緒上嚟、突然好想買賣，有個計劃跟住嚟行會減少好多行為錯誤。然後就係比啲耐性，二十歲發達會上新聞咪就係因為極罕有，如果大家運氣有咁好梗係恭喜曬，如果無都唔緊要，股神巴菲特大部分身家都係後半世賺，堅持一下人人都可以享受財務自由！

祝大家荷包早日fat fat 🤑

- me want faat daat