Cash is King! (?)

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲 click 下面個制 subscribe 喇 👇

想睇我之前寫過咩？快啲click入黎啦！

如果問身邊嘅朋友唔買股票嘅原因，不外乎都係覺得 1）風險大  2）好複雜，結果就係一直唔敢入市、最多做定期或者買保險。你可能諗，長揸現金最多無得賺，起碼唔會輸錢先啊，"cash is king!"🤑

「千萬富翁」都可以好窮

舊年花旗銀行公佈嘅「香港千萬富翁調查報告 2020」顯示，全港擁有1,000萬港元或以上淨資產超過51萬人，創歷年新高；但再睇落去，你會見到呢班所謂富翁嘅資產總值主要分佈係物業（71%）同現金及存款（15%），股票淨係得7%，基金及債券就佔5%。另外，呢班富翁嘅平均年齡係60至61歲，即係差唔多要退休嘅年紀（除非你當60歲係中年），資產中位數係1,550 萬港元。

假如呢班富翁得一層自住嘅樓，層樓都已經值1,100萬，現金揸232萬，股票+基金債券就唔夠200萬。層樓如果唔會出租又無其他收入來源[1]，其實都唔使羨慕呢班千萬富翁，尤其香港地3、400尺嘅樓都可以賣成千萬，佢地生活未必真係富裕過你同我。但我嘅重點唔係想講呢班 「富翁」有錢定無錢，而係長遠點樣理財。

除咗儲錢仲可以做咩？

如果有睇我篇儲錢！儲錢！儲錢！就會知道儲錢對年輕人早日達到財務自由嘅重要性，下一步就係要識得投資，唔好淨係攬住舊磚頭過日子。

Ben Carlson整理過去十年唔同資產嘅表現，結果係cash唔係king，甚至可以話係trash，最高回報率得2%（2019年），平均得0.4%，而且唔係講緊擺床下底嘅現金，起碼要放係有利息收嘅儲蓄戶口或者買短期國債等等，遠低於股票甚至房地產信託基金(REITs)。再加上通脹令現金貶值，長揸現金都係會蝕。

淨係睇十年唔夠？咁就可以參考紐約大學教授Aswath Damodaran整理嘅一份1928年至今嘅股票、債券同現金回報率表：如果1928年擺100美金落標普500，到2021年筆錢會滾到超過76萬，擺短期國債就只有2,000美金，長債就8,500美金，呢個時候你會話cash is king 定 trash？如果你投資目標係睇二十年、三十年甚至一世，而唔係打算短炒甚至day trade，股市短期上落真係唔使擔心咁多，"stocks only go up"反而唔錯得曬。

引用 Nick Maggiulli 做個總結，傳媒一係報某個二十歲後生仔買中某隻coin而變億萬富翁，一係報某個後生仔炒輸窩輪破產，但唔會有媒體報某位六十歲人士唔敢投資、長揸幾十年現金而資產貶值。投資梗係有風險，但完全唔投資嘅風險黎得更慢更危險，適當投資同接受到一定風險先有潛在回報 。短期內係股市輸錢得人驚啲，定係退休做執紙皮嘅 「千萬富翁」得人驚啲？[2]

 祝大家荷包早日fat fat

- me want faat daat

[1] 香港有安老按揭計劃（抵押自住物業收年金），但計劃至今得5,209單申請（截至2021年12月31日）

[2] 「千萬富翁執紙皮」呢個講法我都唔記得邊度聽翻黎（唔排除係平時同屋企人吹水吹出黎）。Google第一個結果係2020年cctvb報過單「新蒲崗執紙皮隱形富婆」，話佢手持兩個總值過千萬嘅物業，一個收租一個自住，呢個case可能真係退休之後太無聊？