你訂咗理財目標未啊?

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲 click 下面個制 subscribe 喇 👇

想睇我之前寫過咩？快啲 click入黎啦！

人人都想發達，唔通個個都可以發達咩。可惜錢係現實咁重要，偏偏學校唔會教你理財🤷 🤷‍♂️。如果唔係屋企人教，又或者你自己有興趣學，大部分人接觸嘅所謂財經知識都係嚟自電視上嘅「財經演員」，每日淨係噏吓大家都知嘅新聞、答吓觀眾邊隻會升 / 跌再吹吓利好 / 利淡消息（當然，啲觀眾打電話去都係問埋啲「我想問 3456 啊，我 8 蚊買，幾時放咗佢 / 咩位入手好啊」，大家打和啦 super）。睇得 me want faat daat 嘅大家當然唔係呢類人，我地係想腳踏實地咁發達嘛😌。

你唔理財，財唔理你。但係你決定自己理財嘅方法之前，第一步要做嘅就係訂立理財目標同計劃喇：究竟你要錢做咩？要幾多錢？點樣儲？儲幾耐先達到你心目中嘅預算？你嘅人生目標係咩？

🤯 係咪頭都大埋呢？就等我同大家講吓我嘅做法啦（記住只供參考，每個人都有唔同目標同做法ma）

短 / 中 / 長期理財目標

你睇完可能會覺得：嘩，唔好再廢啲，我都識啦。啱啊，就係要由最基本嘅開始諗，清楚知道自己儲錢 / 投資為乜，思緒都無咁亂啦。

短期目標 （3-6個月）：

應急錢要幾多因人而異，例如我play safe嘅、想一年揸兜都過到日子，有啲人可能有 3 個月開支就心安。只要你諗下自己有幾多錢會揸兜都訓得著，個個金額就係你應該要有嘅應急錢。3 個月開支唔使多解釋啦，我當應急錢係 no touch money，咁梗係要有其他錢做短期開支。Happy money 就係你接受呢半年可以超支幾多，如果齋做儲錢苦行僧真係無乜意義，得一世人梗係趁後生要識得 enjoy世界，使啲額外錢唔怕嘅，唔係純粹墮入消費主義就得啦。

中期目標 （2-3年）：

有啲比較大筆嘅使費，例如想學車、裝修、一段長時間旅行呢啲，短短幾個月未必儲夠錢。咁你就可以將呢類預計係幾年內想做 + 可能需要好幾萬嘅項目列出黎，等自己知道儲呢筆錢係為咩同埋要儲幾耐。

長期目標 （10年+）：

講緊最少需要 10 萬以上先達到嘅目標，甚至 7、8 位數，例如退休同視錢財如糞土嘅境界（😎），想越早達成呢個目標就當然要越早開始。除咗靠強姦金強積金（仲要你移民都唔知有無得即時攞翻），求人不如求自己，盡早開始買低收費嘅 ETF / 其他低成本投資方法啦！儲錢越早越少煩惱！

祝大家荷包早日fat fat 🤑

- me want faat daat