Just Keep Buying

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲 click 下面個制 subscribe 喇 👇

想睇我之前寫過咩？快啲 click入黎啦！

先比幅圖大家睇 🙁：

呢排美市真係低處未算，除咗「正式」步入熊市（標準係高位跌 20%），大家睇下上面七間大公司嘅市值跌咗幾多萬億（標普指數跌幅有 42.5% 由佢地貢獻），曾經最高峰嗰陣有六間公司市值過兆，而家 Tesla 同 Facebook都係呢個萬億俱樂部跌翻落去。蘋果雖則保住兩萬億呢個關口，呢排蒸發咗嘅市值都多過巴菲特間 Berkshire Hathaway 嘅總市值 😧。

除咗熊市，就算唔多識得金融經濟嘅普通人都肯定睇過呢啲新聞標題：通脹 🥶！加息 🥶！科技 / 疫情受惠股大跌 🥶！密碼貨幣變垃圾 🥶！ 每日嘅壞新聞一單接一單，但如果你問我點睇，我會照答你：Just keep buying。一我唔係經濟金融專家，我唔識得分析；二我唔係預言家，唔知道幾時跌完，亦唔知幾時上翻去；三我嘅目標好明確，我要起碼睇十年八年，而長遠都係股市升嘅幅度、風險同成本我最接受到同跟到。

如果有興趣睇本簡單嘅理財書，我會推薦 Nick Maggiulli （Of Dollars And Data 作者）嘅 Just Keep Buying。內容簡單易明，而且好似佢 Blog 咁講，入面有大量簡單數據同你講點解要 keep 住入市，而且無論咩時候都要買。就好似我第一篇《儲錢！儲錢！儲錢！》，大多數人就算年年投資賺錢，都要去到四十幾歲先見到投資回報多過儲嘅錢（中間突然發達當然另計啦）。你未去到呢個年紀嘅，可以做嘅就係 keep 住入市、keep 住儲錢，而家跌對你反而仲有利，趁低位入多少少。

今日買完聽日再跌點算？唔通你有本事捉到最低位嚟入？所以話入市唔淨係一串數字，仲睇你點樣管理同認識自己情緒。睇呢本書最大得著係，你有各種情緒係一回事，歷史點樣行係另一回事。有牛市就有熊市，有回報就有風險，俗啲講句就係出得嚟行預咗。

曾經嘅我都會毫無意義咁每晚望住個市上上落落，而家我做法係：定期過錢去證券戶口，set 幾個價位目標，到咗就自動幫我入，慳翻時間同精神，就算起身見到股市又又又跌嘅新聞已經無乜感覺，因為我想發達就係預咗個市呢兩個月可能大跌，我等緊嘅係 10 年後嘅我會多謝今日仲肯入市嘅我 😤。

祝大家荷包早日fat fat 🤑

- me want faat daat