靠匯豐過世？買金保值？lol

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲 click 下面個制 subscribe 喇 👇

想睇我之前寫過咩？快啲 click入黎啦！

回不去的匯豐

匯豐小股東又來了！琴日滙豐係九展搞股東會議，一班小股東去抗議，「滙豐小股東權益大聯盟」仲租埋貨車同拉橫額，要求派息翻去以前水平同分拆業務等。

大家仲有無印象 2020 年有股民係記者會哭訴匯豐唔派息，其中一位話自己揸住 5 萬股，平均買入價 $60 （呢排股價 ~$50），成本 $300 萬以上。另一位就話自己買入成本 $130 萬。我好記得呢個畫面係因為當時同阿媽係到睇電視新聞，望住呢班股民係到喊話退休諗住等收息過世，我地兩個好地獄咁笑到 gap gap 聲，因為真係理解不能：005 係 2008年之後死咗咁耐，一股收幾蚊息嘅年代一去不返，呢班人究竟要幾熱愛匯豐先咁多年不離不棄？

我唔知呢班股民係咩原因而堅持，如果背後係有經紀為咗抽佣而慫恿，呢啲人就真係仆街喇。如果係因為有朋友都話買，又或者自己思想仲停留係「買匯豐等收息過世」呢種confirmation bias，難聽啲講句：「條路自己揀，仆街唔好喊」。雞蛋唔好放同一個籃、投資組合要多元、揀個股難度高呢啲我唔想講完又講，但現實就係有人蝕咗老本都唔願意認清現實，仲咁硬頸係到死守。

仲有「買金 = 保值」

個世界已經唔係咁運作好耐！金價 (in USD) 沉咗十年有多，香港金價都差唔多，就算 10 年後有得賺，呢 10 年嘅時間、機會成本又值唔值得？等得嚟通脹都唔知升咗幾多個 percent 啦。我都曾經有黃金保值嘅白痴概念，仲係舊年跟風買金礦股（真係衝出嚟柒），心諗終於到金上位喇掛，又疫情又多人唱好，點知呢個 10 年頹勢繼續無運行，執筆呢下都係唔過 $1,800。好彩早醒，蝕千幾蚊就走咗人，到今日隻金礦股都仲未過我買入價。

Don't Fight the Market

有睇《打仗嘅話 股市咪跌硬？》就知道個市點行輪唔到我地話事，你可以做嘅就係順住個勢行，而唔係明知山有虎偏要蝕住錢行。如果仲有人同你講買匯豐退休同買金保值，你可以自信啲講：「大清滅亡喇朋友！」

祝大家荷包早日fat fat 🤑

- me want faat daat