入市一年的五課

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲  click 下面個制  subscribe 喇 👇

想睇我之前寫過咩？快啲 click入黎啦！

雖則呢幾個月嘅跌市都幾甘下，但好彩係我從來都唔會一鋪過買個股，一直同自己講要放多幾個籃、買 index ETF，就算其中一樣投資輸曬都訓得著。

同大家講下我呢一年由零開始有咩得著：

1. 投資唔係講 right or wrong，而係搵到錢 or not 📈 

就算你用幾多時間同精力研究自己想買嘅股票，個市點行都唔到你控制，個市亦唔會理你啱定錯：你以為 A 公司賺錢所以股票都一定會升，現實股市偏偏唔係咁行，就好似 Amazon 同Microsoft 都用咗十年以上先翻到 2000 年之前價位。當你發現股市表現同你相信嘅常識同原則倒轉嚟行，恭喜你已經參透咗所謂嘅 market 了 👍。相反，如果你以為自己明股市點運作，其實你根本唔明股市點運作。

2. 自律自律自律

如果突然有呢個諗法：「🤩 哇，今晚個市升到fat fat聲，我都想買啊！」，然後興奮到準備login 股票 account 嗰陣，我嘅建議係即刻攤上床訓。啱啱開始買股票嗰陣，我都會晚晚睇住股價上上落落，一升就覺得要再入，一跌就忐忑幾時要放。而家嘅我好少會望實啲價，如果有想買嘅股票，咁就 set 好目標價（用 Good Till Cancel，到我目標買入價就自動幫我入），最多一星期先仔細啲咁睇一次自己 portfolio，唔好做埋啲又衝動、又柒、之後又後悔、仲要輸埋你血汗錢嘅行為！🙅 🙅‍♂️

3. 認錯都要真係學到嘢

好似我上面講，我曾經都係日日毫無意義咁望住股價嘅人，當你知道咁做係浪費時間，就要諗辦法盡快戒甩佢，唔係知完就算。投資亦然，如果明知自己一時興起入市，下次就梗係避免重複犯錯。蝕錢就唔好再揀個股喇，先買指數 ETF 啦，有輸得起嘅錢先揀股。

要避免犯同樣的錯誤，首先要記得你犯咗咩錯誤。有人建議每一次買賣前寫係本 notebook 或者整本投資日記 📒，記低你交易前嘅情緒同原因，因為人嘅記憶唔係咁可靠。我自己就唔會寫得咁detailed，淨係整咗 spreadsheet 做記錄，詳細做法睇你習慣同覺得方便就可。

4. 呢個世界無零風險 ❌

現實世界任何決定都有一定風險，就好似你以為現金擺銀行好安全，但當通脹一嚟，現金價值都會下降，100 蚊變 96蚊，變 92蚊、90 蚊....... 將錢收係床下底都驚水浸 / 火燭 / 有賊入屋啦，呢個世界邊有零風險。如果有人同你講「我唔投資係因為風險太高啦，努力儲錢穩陣又唔會蝕」，I call bullshit 🙄

5.  條路仲好長，放膽入市啦

長遠想發達，又或者唔想撈嗰陣有足夠嘅財富做你想做嘅嘢，除非你有慈母慈父養你一世，如果唔係都係要入市。你想追過通脹 + 累積嘅財富唔係齋坐係到而係有回報，現金 / 定期 / 債係過去幾十年都唔夠整體股市揮。如果你今日先廿幾、三十幾，起碼仲有 30 年 up 慢慢累積同賺複利，加上我地呢啲年紀未到搵錢最黃金嘅階段，早啲入市有咩事都容易翻轉頭，唔好到 4、50 歲先嚟輸自己辛苦賺 2、30 年嘅錢。除非地球爆炸，股市變零 vs keep 住賺，我賭後者。

祝大家荷包早日fat fat 🤑

- me want faat daat