You Are Wrong About

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲 click 下面個制 subscribe 喇 👇

想睇我之前寫過咩？快啲 click入黎啦！

早排網上見到個笑話：有對中國夫婦唔知係以前窮定本身就特別慳，仔女買洗衣機唔捨得用，連去廁所都話要落樓下公廁慳水，最後就係慳埋啲無謂嘅地方而係第二度浪費錢，例如落樓去廁所跌親骨，洗衣機就擺到爛咗。正所謂無文化真可怕，更加得人驚嘅係個世界轉變咗咁多，呢啲人嘅思想仲係大清，同世界發展完全脫軌。

跟住又醒係中學無論係讀通識、地理、歷史又或者經濟，應該都會讀到 more-developed / less-developed countries （已發展 / 發展中國家）嘅概念，但大家有無疑惑中國呢類國家應該點分？唔完全係已發展國家，又好過大部分低/發展中國家，課本亦見唔到其他形容詞或者分類，依然係得兩個分類比你揀。

Factfulness

根據世界銀行數字，全球超過七成人住係中等收入國家，再分 1) 中低收入 (lower middle-income) 2) 中高收入國家 (upper-middle income) 嘅話，前者係人均收入落係 $1,086 至 $4,255 美元 ，而後者就係 $4,256 至 $13,205 美元，至於低收入人口就不足一成。香港人均總收入超過五萬，比世界銀行定義高收入 $13,205 高幾倍。

我係睇 Factfulness 呢本書先 update 世界銀行用嘅幾層收入嚟分類，而唔係就咁已發展 / 發展中咁二元嘅分法。最大問題就係當學校都係咁教書，唔少人離開校園又唔再 update，靠所謂直覺、以前讀書嘅 common sense 同過分簡單嘅歸納方法嚟諗嘢，真係百害而無一利，仲容易同社會、世界發展脫節。

試下問大家兩條人類命中率衰過猩猩三揀一嘅問題：

1. 全球自殺率係過去 20 年上升定下跌？

A. 下跌 25%

B. 無變化

C. 上升 25%

（九成幾人答錯）

正確答案係 A. 下跌 25%。

如果你答錯，可能係而家社會願意討論心理健康，又或者媒體報導多咗而令你有認知誤差，以為呢個世界多咗人自殺。就好似飛機作為最安全嘅交通工具，但只有發生空難先會上新聞，「飛機好安全，安全過係陸地搭車」就唔會有人報。

2. 1990 年世界上有 19% 嘅 65 歲或以上人士繼續工作， 咁到 2030 年嘅百分比會係幾多？

A. ~ 21%

B. ~ 41%

C. ~ 61%

（88% 人答錯）

正確答案係 A. ~ 21%。

答錯嘅話好可能係人口老齡化呢個議題經常出現係我地身邊，尤其富裕國家，然後就會延伸一大堆社會討論：撫養率、福利保障等等。當然，人口結構轉變的確係香港、日本、中國、歐洲等地方發生，但我地攞相對富裕國家嘅情況嚟歸納嘅話，就會高估咗全球老齡化嘅速度。

腦袋是個好東西

就咁睇當下好容易令人覺得個世界充滿壞消息，現實係我地生活係歷史上最好嘅年代：活過 15 歲唔係奇蹟、生水痘唔會死人、195 個國家只有 29 個落入低收入國家...... 香港教育制度可能落後，但呢個年代有咩好奇嘅隨手 Google 就揾到資料同答案，唔好將知識同世界觀外判比中學啲書就算。

上面個對夫婦以為錢係靠死慳死抵儲翻嚟，殊不知呢個年代睇一次病可能貴過一年慳嘅沖廁水，亦唔知道其他理財方法幫到佢地儲錢。如果大家仲未踏出第一步，睇埋呢篇好行動喇！開戶口、了解 MPF plan、查下咩叫 ETF、點樣交易同買賣...... 最重要就係擺錢落去，啲錢就咁放係銀行同擺床下底無分別的。

祝大家荷包早日fat fat 🤑

- me want faat daat