當你有舊錢：一筆過投資 vs 分幾次入市

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲 click 下面個制 subscribe 喇 👇

想睇我之前寫過咩？快啲 click入黎啦！

tl;dr

• 一筆過入市好過分幾次咁入

• 但好多人落唔到手 — 投資講心（理）多過講金

• 有閒錢就入市，而唔係揸住現金由得佢坐係到

又到我執人口水講呢個好多人都擔心嘅問題：如果我有十萬，一次過入市好得人驚咁，不如分開一萬一萬咁入，人都安心啲～ 比起 lump sum 一筆過買入，平均成本法 (cost averaging) 好似穩陣啲，遇著跌市之後仲賺得多啲添。

但根據歷史數據，lump sum 大部分時間贏 cost averaging，而且風險都無想像中咁大。

證據一：大部分時間都係一筆過入市贏

Vanguard 睇翻 1976 至 2022 年全球市場數據，差唔多七成時間都係 lump sum 投資贏分開入市，而分開入市就七成時間贏揸 cash，即係 lump sum 入市 > 分幾轉入市 > 揸現金。

證據二：大部分投資產品都係一筆過入市贏

睇翻過去 25 年，無論係 Bitcoin、美債、金、新興市場、60/40 股債組合定係標普，一次過入市都係賺過分幾次嚟入，第一行數字就係講 cost averaging 係任何兩年最少跑輸 lump sum 4%，分開咁買比特幣甚至跑輸一次過買三百幾%！

理論係一回事 點跨過心理關口先

篇文嘅目的唔係要講經咁貼曬啲數據出嚟（其實係背後計算方法我唔識😐），反而想探討點樣 overcome 一次過入市呢個心理關口。當你以為自己 ready，入市個刻講嘅都係情緒：

我會唔會買完第二日就跌？

呢排升緊wo，不如等佢調整 / 跌翻少少先買？

可能而家已經到最高點呢？

兩年幾前嘅我就係猶豫好耐，拖幾個月先的起心入市，然後就等咗差唔多兩年先翻家鄉 🙂。

好彩係我一嚟就上咗咁寶貴嘅一課，而家 risk tolerance level 100 😎，因為我發現長揸真係賺到錢，而且比其他投資方法簡單，一出糧就買 = no-brainer。

Final lesson：搵啱自己嘅投資方法

呢刻做唔到 lump sum 投資唔緊要，我都係用咗兩年幾先夠膽揸少啲現金（唔多過一個月糧）。但每個人接受風險嘅程度唔同，亦唔係個個好似我咁發錢寒，咁咪按你節奏同需要放慢嚟入市。

不過，大家都唔好拖太耐，假設你有五萬十萬，一次幾千幾千咁入可能慢咗啲，最好都係 set 個 deadline，例如三個月或者半年內就要投資曬呢筆錢，買股票或者定期都得，比少少壓力同動力自己，點都好過由得啲錢擺床下底。

祝大家荷包早日fat fat 🤑

- me want faat daat