錢換選擇 旅遊換自由

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲  click 下面個制  subscribe 喇 👇

想睇我之前寫過咩？快啲 click入黎啦！

細個同屋企人去旅行仲 wild 過 wild camp，因為佢地出發前只會買機票，住宿、行程全部都係落地先諗：落機請的士司機車我地去最旺同最多平住宿地區，一路拖住行李一路揾平價酒店 / 民宿，然後問有無識得包行程嘅司機，或者附近揾間本地旅行社參加一日遊。直到而家阿媽同佢啲朋友去旅行都仲係咁做，真。勇者無懼。

之前講笑話細個以為有錢人先可以去日本，我屋企雖然一啲都唔富有，但年年都會揾個地方去，阿媽更加講過其他都可以慳，但健康同旅遊唔慳得。到上咗大學開始自己揾錢去旅行，有時會諗旅遊究竟有咩意義？因為香港人特別中意旅行？好多人去過我都要去打卡？

係自由啊

一個人旅行嗰陣我會不停行、周圍行，個景點三公里內都好少坐車。好多時咁 9 行嘅經歷仲深刻過參觀嘅景點，當你可以拋離日常、唔使顧及其他人同事，呢個時候係最無限制咁思考究竟自己最享受做咩、啲錢想用係邊同埋點做抉擇。例如我會後悔買咗件唔啱使嘅衫，但從來都無後悔過去咗邊度旅行，咁我就明幾貴嘅手袋都比唔過體驗。當然，幾次旅行未必令人生有咩大轉變，又或者一定會搵到咩意義，但我信經歷係幾多錢都換唔到（老土都係咁講），尤其旅程中嘅意外、挑戰、遇到嘅人等等。

開始一個人旅行先發現，原來我自己都做到咁多嘢，真係人都自信同大膽啲！由一開始連紙巾沐浴露洗頭水牙膏牙刷都帶齊嘅我，到而家只要帶個背囊、兩三套衫同護照就可以起行，其他 airbnb 無先落地買，因為邊度會有人唔用呢啲生活用品？未做過 backpacker / 一個人去旅行嘅話誠意推薦試一次，你會發現原來人可以咁容易適應新環境同咁識變通，而且係年輕嘅奢侈嚟，試下想像自己 70 歲仲可唔可以咁隨心周圍行？

直接啲講，幾多錢都帶唔落棺材，死之前我最驚後悔體驗得唔夠多。無咗份工咪再揾過，人工低咪諗下秘撈，而家份工好無聊咪拋下履歷，只要個天未跌落嚟咪咩都試下。幾時升職、幾歲幾多人工呢啲唔到我地控制，講際遇同運氣嘅嘢煩少啲。生活係咁發達嘅地方已經好幸運，仲要而家旅遊嘅成本比以前平一大截，買個 Gucci 袋已經夠我豪遊歐洲一個月，有條件就更加要珍惜呢個優勢！

財務自由對我嘅意義

唔記得邊度睇翻嚟，要達到財務自由有三個階段，第一係無欠債，第二係凍飲加錢唔眨眼，第三係買經濟艙機票唔格價。雖則唔知要幾多年先達到最終財務自由，比起一般文章話要人工 X 幾多倍、某個年齡達到某個數字呢啲目標，用自己嘅長遠計劃同消費行為嚟定義夠實際同易想像好多。希望大家財務相對自由嘅時候就開始盡做自己最享受嘅事！

祝大家荷包早日fat fat 🤑

- me want faat daat