出街食嘅係體驗

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲  click 下面個制  subscribe 喇 👇

想睇我之前寫過咩？快啲 click入黎啦！

話說上星期同朋友出街食飯，當我見到大商場幾塊 pancake 要 100 蚊嘅時候忍唔住講咗句：「乜 pancake 咁貴㗎 🤑。」係係係，我明出街食飯買嘅唔止係食材，仲有人工舖租水電煤 blah blah blah，但平時食開屋企飯嘅我（多謝阿媽咁勤力），出街睇 menu 好易覺得咩都貴，又或者嫌分量唔夠我呢啲 food fighter 食、無幾條菜、太鹹太油太甜、餐廳唔乾淨...... 我呢啲西人大把野可以挑剔一餐。

少啲出街食真係慳唔少（廢話）

睇翻政府統計處 《2019 至 20 年住戶開支統計調查》，香港住戶每月平均開支係 $30,230，而出街食 / 外賣就 $5,045，即係佔 ~16.7%，僅次於住屋 39.3%。就咁睇 5 千蚊除開唔係好多，但呢個只係住戶平均，如果對照翻後生仔人工，當中位數有萬九蚊，淨係出街食就 $3,173，偶爾食一、兩餐豪啲嘅就隨時 $3,500 以上。唔知 3 千蚊對大家嚟講係一個咩概念，但翻工帶飯 + 多數星期六日中午出去食嘅我好少一個月食飯用多過 $1,000，同平均數值比一年慳兩萬幾，夠我去幾次旅行喇！ 

但出街食唔係為食物 🙅🏻‍♀️ 🙅🏻 

戴定頭盔先，我唔多識享受食物，亦好少感受到「哇，真係好好食」嘅餐廳。對我嚟講，出街食就係為咗 1）屋企唔會煮到嘅菜  2）同朋友食飯嘅 vibe，即係屋企無辦法製造嘅體驗。出街食肯定唔夠屋企煮嘅乾淨 / 平 / 健康，但有時想擺脫單調嘅生活，煮少一餐輕鬆下，又或者揾間靚餐廳同朋友 chill 下，出去食一兩餐好西係為調劑生活同社交。儲錢為咩，就係買多啲你享受嘅選擇同唔使 do 嘅時間，更何況呢個年代唔再係飲少幾杯咖啡或者去少幾次日本就買到樓，除非你睇住戶口多一個零嘅滿足感夠過一世，唔通等到 60 歲先捨得去環遊世界，然後周身病痛一座山都爬唔到？

財富 = 無 fing 出去嘅錢 + 可以回味一世嘅經驗 

係人都想好似巴菲特咁有錢，但佢大部分財富係年過半百先賺嘅，仲要做到佢咁成功，唔知要花幾多時間係精力係間公司到。我就貼地啲，唔使好似佢咁有錢，但我都唔想食 m 記過日子（巴菲特早餐成日食 m 記包同可樂），比我穩定地有啲錢、唔使打工打到退休年齡同趁後生去多幾個國家就可以。

（題外話：唔記得係咪去布拉格，總之我有次好豪咁叫咗 full course — 雜菜湯、意粉、雜果雪糕、蛋糕、一扎啤酒 — 最多 2 百幾港紙，前面個小朋友好羨慕咁望住我一個人食咁多碟，proud 😎✌️）

祝大家荷包早日fat fat 🤑

- me want faat daat