講錢先唔傷感情

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲  click 下面個制  subscribe 喇 👇

想睇我之前寫過咩？快啲 click入黎啦！

今次同大家講個真人真事：話說一對夫婦本身屋企有錢，係有錢到兩公婆成世人唔使 do 都有幾層樓同舖收租，所以佢地幾乎無搵過錢。點知其中一個生意失敗（大家都估到點解啦），仲欠債唔知幾多位數，最後幾乎要賣曬啲樓同鋪先還得清，得翻層自住嘅樓。

我都同呢家人識咗好多年，當我聽到話佢地爭錢爭到要賣曬啲樓同鋪，我真係😮😲😐😑🥴，因為佢地有錢到可以一滴汗都唔使出咁嘆住過世，點知人到中年先嚟不自量力借錢做生意，除咗錯在唔識人間煙火又想靠自己搵錢，更加錯嘅係兩個人都完全唔知對方財務狀況。

唔講錢先出事

做生意嗰個由頭到尾都無同對方講，包括做咩生意、借邊個錢、借幾多錢、利息幾厘...... 如果佢係中間任何一個位同屋企人講，佢屋企肯定唔會比佢繼續錯落去，仲輸曬老豆老母嘅辛苦錢同下一代嘅資源，一副靚牌就咁一鋪清袋。

我係一個咩狗屎垃圾都會同屋企人講嘅人，所以我係聽到 😮 曬，邊有可能做咁大個決定都唔同身邊嘅人講？但類似嘅 case 我聽唔少，更離譜嘅我都聽過：入醫院做手術（做咩手術、幾錢）都唔同屋企人講，但明明一家人關係唔差。我唔知係文化定純粹家家有本難唸的經 🙃，總之我係經常都會同屋企人講錢，包括我賺幾多、儲到幾多、買幾多股票、每個月平均開支等等，而屋企財政、開支等等我亦都知得一清二楚。

點解要同身邊嘅人講錢？

1. 平時唔會有人同你講錢 🙅 🙅‍♂️

學校唔教，出到嚟社會更加無，如果唔係同屋企人或者身邊最親嘅人講，你有咩機會同人傾理財？就算你係學院派，靠自己睇書，你嘅消費同理財習慣有幾多係跟書跟專家，又有幾多成係受屋企人、朋友、識得嘅人影響？

2. 多個人照住 減低出事機率 📉

有啲人覺得講錢好尷尬，但我就話同人講又唔會少咗舊錢，而且唔係叫大家報數講自己資產，而係多個人知你有咩計劃同睇住你方向，你自己都要諗過度過先解釋到比人聽，順便幫自己釐清頭緒。

3. 知道身邊嘅人點理財 啱用先學 👌

唔啱用都唔使 judge，自己諗邊一套啱你就得，例如我自己消費觀無乜同身邊嘅人重疊，少買非必要消費品但又唔會好似阿媽咁慳，投資就比屋企人進取又唔會好似 reddit 個啲咁博。知多啲身邊嘅經驗點都好過係連登睇人吹，如果學到啱嘅搵銀方法更加要同身邊嘅人齊齊學、齊齊發啦 💸 ！

祝大家荷包早日fat fat 🤑

- me want faat daat