三個小過 = 一個大過

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲 click 下面個制 subscribe 喇 👇

想睇我之前寫過咩？快啲 click入黎啦！

相信大家呢幾日都睇唔少 Mirror 演唱會新聞，琴晚仲發生嚴重事故。班粉絲本來開開心心追星變成睇恐怖片，表演者就更加無辜。演唱會有傷亡並唔少見，好似舊年 Travis Scott 嘅 Astroworld Festival 因為 mosh pits（fans 互相撞、向前衝） 而造成 10 死、幾百人受傷，之後當地警方、FBI 、保險公司同眾議院都有參與調查。

雖則我唔係鏡粉，但呢幾日本地新聞經常報導 Mirror 演唱會安全措施問題，連粉絲都睇唔過眼，聯署要求取消特效，外人睇真係頭都大埋：演唱會經常都有，表演中間有突發事件都唔出奇，但最後點解會釀成大意外？

三個小過 = 一個大過

暢銷作家 Malcolm Gladwell 有本書叫 Outliers，當中第七章嘅 The Ethnic Theory of Plane Crashes 探討空難成因。作者發現大部分飛機失事都無荷里活電影咁戲劇化，亦唔係有咩特別壞嘅天氣或者嚴重硬件故障，而係連續累積幾個小錯導致致命過失，例如天氣唔係咁好、航班 delay 、機師太早起身同兩位無合作過嘅機師 part 住上都會增加機組人員壓力，往往就係呢啲看似微不足道嘅因素影響機師判斷力同溝通，最後小錯不斷而發生嚴重意外。

1997 年大韓航空 801 航班由首爾飛去關島，飛機硬件無異常，最後全機 226 人死亡，26 人生還。Gladwell 睇翻呢場空難嘅黑盒對話記錄發現：

1. 機長話好攰好眼訓，又投訴航空公司揸到佢地盡，來回航班啱啱好 8 個鐘而唔使補貼佢地

2. 當副機師發現問題嗰陣兜個圈同好有禮貌咁講：你覺唔覺呢個範圍好似落幾多雨？

3. 二副機師睇唔到跑道都唔敢即刻講

機師疲倦呢個問題相對容易解決，但第二、三個問題難搞好多。副機師講「呢度幾多雨」其實係暗示「天氣情況好差，差到連跑道都見唔到，我地點算好」。之後二副機師講咗句：「機長，雷達真係幫我地好多。」呢句又點解？「機長，你望下雷達同出面啦，天氣真係好差，今次大獲喇。」

當個機長係到呻好眼訓嘅時候，你估佢聽完呢兩句有咩反應？「係啊，天氣雷達真係幫到我地好多。」

呢場悲劇結果係，飛機就嚟撞落山嗰陣副機師同二副先講得出「見唔到跑道」，當副機師想升高翻架飛機已經太遲。事後大韓航空決定要訓練所有機師用英文溝通，因為韓文嘅長幼尊卑、敬語等太影響資歷淺嘅機師直接講出問題，係危急關頭仲咁有禮貌，而英文無敬語同容易理解，今時今日嘅大韓航空先變得咁安全。

「遇到問題自己執生啦」

搞過 event 嘅人都感受過無論幾完美嘅計劃都可以有突發事件，所以識得隨機應變非常重要，但「執生」係針對突發嘅小事，而唔係攞嚟解決所有問題嘅方法。演唱會一場咁大型嘅活動需要極多人手、硬件同軟件配合，而且參與人數過萬，就算事前準備做足 120 % 都有機會發生意外，更何況呢次演唱會狀況連連？意外原因仲有待調查，但好大機會係有好幾個環節出錯或者做得唔足：full rehearsal（所有效果同步驟都做足，所有工作人員都有參與） 做咗幾次？舞台設計、審批、落實、動工、檢查同監察，有無邊個位做少咗？

兜圈講嘢都要聽者 get 到言下之意先係有效發言，溝通就係要大家都明對方咩意思先有意義。點解班 dancer 要係 IG 到投訴？會唔會係現場得唔到舞台監督或者主辦方回應，雙方溝通無效，最終 n 個小錯而造成今日意外？

一個好嘅計劃係你大部分時間都可以跟住嚟做，將你諗到嘅風險減到最細，現實有變嗰陣作出些少調整就可以繼續行。無論係投資理財、工作定係生活管理，係你可以控制到嘅範圍內做足，就算有咩意外你會覺得係唔好彩，而唔係比自己有遺憾或者後悔。

祝大家荷包早日fat fat 🤑

- me want faat daat