如果想去外國試下

多謝大家支持 me want faat daat！如果你睇完呢篇文覺得可以睇多幾篇，又或者想推薦其他朋友睇，咁就要快啲  click 下面個制  subscribe 喇 👇

想睇我之前寫過咩？快啲 click入黎啦！

英國政府係上個禮拜公佈 High Potential Individual (高潛力人才) visa 計劃，就算你學士唔係讀港大，都可以讀翻個碩士，然後申請短期簽證兩年，再搵機會申請長期工作簽證。對於無 BNO 又或者無咩家底嘅朋友嚟講，呢個簽證算係低成本嘅移民入場券，有條件又想試下水溫嘅不妨一試。

見到呢單新聞，我就順手去搵下英國收入中位數、生活成本等等嘅資料。睇翻英國國家統計局嘅有關個人收入嘅數據，20/21 報稅年度嘅年薪中位數就係 31,285 英鎊。如果按而家英鎊兌港幣 9.88 左右，年薪即係港紙 ~ $ 310,000，月薪就 ~ $25,700 。扣埋基本 20% 稅，收入就大概係 24,000 - 25,000 鎊、月薪兩萬港幣左右。

就咁睇人工，英國同香港差唔多，但如果睇埋其他福利，例如英國五天工作嘅打工仔有 5.6 週（28 日）有薪假、OT 點都少過香港同醫保等等，得閒歐遊話咁易。至於生活成本，有睇新聞就會知道香港唔知蟬聯幾多次全球生活成本最貴城市。ECA International 啱啱出報告，2022 年生活成本最高嘅頭 5 個城市係香港、紐約、日內瓦、倫敦同東京。除咗人人都知嘅高樓價，係香港飲杯咖啡、買蔬果同油（無論食用油定車油）都貴絕全球，外國嘅月亮真係圓啲咁。

無論你想去英國、加拿大又或者第二度 working holiday，我會先考慮下面幾點：

1.你嘅 priority 係咩？

雖然我都成日心思思想試，但諗到呢幾年環境唔難專心儲錢 🙃，而我嘅目標就係越早唔使 do 越好，又未咁急切要走，咁咪過多幾年再諗。得你自己先會知自己想趁有精力出去行幾年、想積極搵銀、定係想建立職業生涯先，達到邊個目標先你會最有滿足感？咁咪做嗰樣。

2.去到邊都係要生活

如果唔使煩住，係香港儲錢真係易過唔少地方。之前見過話係北歐做 data scientist 嘅網友話落袋嘅錢其實得兩萬幾，同我想像嘅都差一截，仲要出街食個普通三文治 + 果汁就 $7x 港紙，住都唔係話平好多。當然去外國生活嘅唔淨係為人工，仲有 work-life balance、政治社會環境等等。係外國可能真係 happy 啲，但你去得生活就點都會有其他嘢煩：可能係文化差異，可能係生活習慣，都可能係要一段時間先重新建立到社交圈子，無得就咁攞個秤x > y 咁比。

3. Just do it ✔️

無論有幾多錢，佢都係幫你達成目標嘅工具嚟。所以如果你真係好想好想出去闖蕩下而又最擔心錢，我會最鼓勵呢種人去試咗先，因為用嘅錢未必你想像咁多。好似我讀大學嗰陣一個人 backpack 歐遊差唔多一個月，所有使費用唔著兩萬，仲要我都幾「豪」：租 airbnb 全部住獨立房 + 獨立廁所或者成間 apartment，餐餐食出面，仲買唔少手信翻黎（我連覺得好聞嘅洗頭水都買咗好幾支 lol）。如果你係打算 working holiday、點都會搵啲錢，咁就更加唔使咁憂錢。無論我有 10 萬定 30萬，都換唔到呢二十幾日、用萬幾蚊就換到一世都記得嘅經驗。如果唔係疫情無得出去，我唔知行咗幾多轉 🥲。時間同精力係咁多就係咁多，但有心搵錢就一世都搵唔完，尤其呢個時代就更加要善待自己，想試又有條件嘅就試咗先啦！

祝大家荷包早日fat fat 🤑

- me want faat daat